Вальфовічу ў Пастаўскім раёне паказалі дзіўную зброю для супрацьпаветранай абароны

У ніжнюю раму ўстаўленыя два драўляныя брусы. На фота прыкметна, што зверху над брусамі ёсць тонкія металічныя краты. Хутчэй за ўсё, стваральнікі хацелі абараніць аператара гэтай устаноўкі ад невялікіх гранатаў, якія скідаюцца з беспілотнікаў. Ідэя спрэчная: нават калі такая граната выбухне, захраснуўшы ў гэтых кратах або адскочыўшы ад іх і ўпаўшы паблізу, радыюсу разлёту яе аскепкаў хопіць для няўдачлівага стрэлка. Але, магчыма, краты патрэбныя, каб пакласці галінкі ці нацягнуць сетку для маскавання. Зрэшты, у такім выпадку яе, хутчэй за ўсё, задзейнічалі б пры стварэнні дэкарацый для візіту Вальфовіча.

Рама з аўтаматамі можа круціцца па коле, магчыма, на ўсе 360 градусаў. Пра гэта кажа тое, што вакол устаноўкі мяшкі з пяском размешчаныя так, каб можна было весці кругавы абстрэл. Рама таксама круціцца па гарызантальнай восі, дзякуючы чаму можна весці агонь уверх пад вялікім кутом – прыкладна да 75 градусаў.

Усё гэта дазваляе выказаць здагадку, што прылада створаная як сістэма супрацьпаветранай абароны. Чатыры аўтаматы, якія страляюць адначасова, даюць высокую шчыльнасць агню. Тэарэтычна гэта павялічвае шанцы адзіночнага стралка трапіць у дрон, а можа быць, нават у самалёт, які нізка ляціць, або гелікаптэр. Але сучасныя ўдарныя гелікаптэры і баявыя самалёты, распаўсюджаныя ў Еўропе, як правіла, маюць абарону ад куляў лёгкай стралковай зброі. Таму галоўная мішэнь для такой устаноўкі, хутчэй за ўсё, беспілотнікі.