ЗША пачалі мадэрнізаваць войска згодна з урокамі вайны ва Украіне
2- 1.05.2025, 18:18
- 2,414
Войска ЗША наросціць выкарыстанне беспілотнікаў.
Войска ЗША пачало найбуйнейшую перабудову з часоў заканчэння халоднай вайны, у планах - абсталяванне кожнага падраздзялення прыкладна 1 тысячай беспілотнікаў і збавенне ад састарэлай тэхнікі, паведамляе The Wall Street Journal.
Калі план будзе рэалізаваны, 10 вайсковых падраздзяленняў, якія знаходзяцца на сапраўднай службе, у значнай ступені пяройдуць на беспілотнікі, выкарыстоўваючы іх для назірання, транспартавання грузаў і правядзення нападаў.
Для таго, каб «выняць урокі» вайны ва Украіне, дзе дроны адыгрываюць важную ролю ў баях, амерыканскія афіцэры апыталі ўкраінскіх вайскоўцаў і кансультаваліся з наймітамі, якія працавалі з УСУ, піша выданне. «Мы павінны навучыцца выкарыстоўваць беспілотнікі, як з імі змагацца, як іх ацэньваць, здабываць іх і выкарыстоўваць у баях, каб мы маглі бачыць за межамі наўпроставай бачнасці», – адзначыў палкоўнік Дональд Ніл, камандзір 2-га кавалерыйскага палка ЗША.
Ён дадаў, што ў амерыканскім войску ёсць беспілотнікі на ўзбраенні, але іх заўсёды было вельмі мала. WSJ адзначае, што звычайна падраздзяленні маюць блізу тузіна беспілотных лятальных апаратаў далёкага радыусу дзеяння.
План, які атрымаў назву «Ініцыятыва па пераўтварэнні войска», стаў вынікам больш чым года эксперыментаў на базах ЗША і навучальным палігоне Хоэнфэльс у Баварыі, які ў часы халоднай вайны выкарыстоўваўся для падрыхтоўкі бранятанкавых войск да магчымага нападу СССР на Заходнюю Еўропу, адзначае WSJ.
У лютым там прайшлі вучэнні, падчас якіх выкарыстоўваліся і беспілотнікі. Праз холад на лопасцях шрубы апаратаў утвараўся лёд, што прыводзіла да хуткай разрадкі акумулятараў, чаго не было на іншых вучэннях, гаворыцца ў матэрыяле.
Акрамя ўкаранення большай колькасці дронаў, амерыканскае войска таксама распрацоўвае спосабы ўдасканалення сувязі паміж жаўнерамі на полі бою з выкарыстаннем мабільных тэлефонаў, планшэтаў і інтэрнэт-тэхналогій, а таксама набывае новую патрульную машыну пяхоты. Войска ЗША плануе інвеставаць блізу $3 млрд у распрацоўку больш дасканалых сістэм для перахопу беспілотнікаў і павелічэння магчымасцей у галіне радыёэлектроннай барацьбы.
Са слоў службоўцаў, агулам перабудова амерыканскіх узброеных сіл каштавацьме $36 млрд у найбліжэйшыя пяць гадоў, якія войска атрымае, скараціўшы некаторыя састарэлыя ўзбраенні і спісаўшы іншыя сістэмы. Апошнія дзеянні запатрабуюць падтрымкі кангрэса.
Дарэчы, войска ЗША спыніць закупкі ўсюдыходаў Humvee, якія былі асноўнай баявой тэхнікай цягам дзесяцігоддзяў, баявых машын агульнага прызначэння Joint Light Tactical Vehicle і лёгкага танка M10, які выявіўся цяжэйшым і менш эфектыўным, чым чакалася. Таксама ўзброеныя сілы ЗША плануюць адмовіцца ад састарэлых верталётаў Apache. Эканоміі сродкаў будзе садзейнічаць і скарачэнне цывільнага персаналу.
Чыноўнік Пентагона распавёў WSJ, што начальнік штаба сухапутных войскаў генерал Рэндзі Джордж і міністр войска Дэніэл Дрысколл нядаўна заявілі віцэ-прэзідэнту Джэй Ды Вэнс, што ва ўзброеных сілаў ёсць план па нарошчванні магчымасцяў з адначасовым скарачэннем выдаткаў. Шэф Пентагона Піт Хегсет ухваліў гэты план, дадае газета.
«Мы не збіраемся прасіць больш грошай. Мы хочам лепш выдаткаваць тыя грошы, якія ў нас ёсць», - сказаў Джордж у інтэрв'ю.
Дрыскал паведаміў, што некаторымі з новых беспілотных сістэм аснашчаны ўжо тры брыгады (падраздзяленні колькасцю 3-5 тыс. салдат, складаюць дывізію) і мэта складаецца ў тым, каб укараніць новаўвядзенні ў астатніх частках на сапраўднай службе на працягу двух гадоў.
Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe
Звязацца з намі можна праз адрас charter97@gmail.com
